Federal Department of Foreign Affairs FDFA

Il cusseglier federal Ignazio Cassis en scola a Glion

Visita en Surselva: Ils 21 da zercladur 2021 è il cusseglier federal Ignazio Cassis sa scuntrà cun dudesch scolaras e scolars dal stgalim superiur a Glion. Ils giuvenils l'avevan envidà da far ina visita suenter la «Emna rumantscha» (l'emna da la lingua rumantscha) ch'il DFAE aveva lantschà il favrer 2021. Lur messadi è cler: Il rumantsch è, gist sco las autras linguas naziunalas, in ferm toc Svizra.

22.06.2021
Ignazio Cassis meets the pupils of Glion.

La visita dal cusseglier federal Ignazio Cassis a Glion fa part da la «Emna rumantscha». © FDFA

«Signur cusseglier federal, fissas Vus pront d'emprender rumantsch?» Questa dumonda è vegnida tschentada da las duas scolaras dal stgalim superiur da Glion, Arina Bertogg e Nina Kreuz, a chaschun dal event online da l'emprima «Emna rumantscha» il favrer 2021. «Sa chapescha, sche Vus m'envidais en Surselva», ha respundì il cusseglier federal Cassis. Ditg e fatg. Ils giuvenils sursilvans han preparà ina invitaziun en furma da video ch'è arrivada cun in clic a Berna. Ed uschia è vegnida nudada ina data en l'agenda dal cusseglier federal: ils 21 da zercladur 2021, visita en Surselva.

In ferm toc Svizra

In osp tut spezial è entrà en la stanza dal terz stgalim superiur a Glion durant l'ultima emna da scola avant las vacanzas da stad. Las scolaras ed ils scolars en la vegliadetgna da 15 fin 16 onns al han beneventà cun ina chanzun da bainvegni e cun in aperitiv linguistic-culinaric. Silsuenter hai dà in schatg dal sursilvan ed ina invista en la cultura da la regiun. Alura han las scolaras ed ils scolars fatg dumondas davart la lavur quotidiana dal cusseglier federal. Il barat ha gì lieu en rumantsch, en tudestg ed en talian. «Voss invit hai jau acceptà cun plaschair», ha ditg Ignazio Cassis a las scolaras ed als scolars. «Grazia a vus resta la lingua viva ed actuala. Vus ans mussais che la plurilinguitad è il futur. La Svizra sto cuntinuar da tgirar la plurilinguitad. Puspè ir a scola ed emprender da vus è ina pussaivladad da far quai.» Il schef dal DFAE ha declerà alura che ses viadi d'exploraziun en la lingua rumantscha cuntinueschia il fanadur cun in curs da rumantsch a Scuol. Ultra da quai ha el preschentà a las scolaras ed als scolars intginas ideas per la proxima «Emna rumantscha» che ha lieu il favrer 2022.

Il cusseglier federal Ignazio Cassis sa scuntra cun las scolaras ed ils scolars da Glion.

Dialog intercultural e diplomazia

La promoziun dal dialog intercultural è in punct central da la diplomazia svizra. Perquai ha il cusseglier federal Ignazio Cassis lantschà l'iniziativa «Emna Rumantscha». A l'emprima ediziun dal favrer 2021, ch'è vegnida organisada ensemen cun il chantun Grischun, èn sa participadas numerusas represchentanzas svizras a l'exteriur. En questa moda vul il DFAE promover la diversitad culturala da la Svizra, ch'è ina plivalur tant en Svizra sco er a l'exteriur.

La promoziun da las linguas minoritaras en Svizra fa er part dals puncts centrals dal dialog politic structurà ch'il schef dal DFAE maina cun ils chantuns Grischun e Tessin e cun las commembras italofonas ed ils commembers italofons da las Chombras federalas.

Back to top