Las emprendistas ed ils emprendists dal DFAE scuvran la Svizra taliana

La giuventetgna e la lingua taliana: quai è il tema da la «Settimana della lingua italiana nel mondo». Er quest onn sa participescha il DFAE ensemen cun las represchentanzas svizras a l'exteriur a questa occurrenza. Las emprendistas ed ils emprendists dal Departament federal d'affars exteriurs han realisà in video davart lur viadi da studi en la Svizra taliana. Nus ans scuntrain l'emprim cun ellas ed els a Bellinzona e faschain silsuenter ina pitschna excursiun a Paris per preschentar ina idea da l'ambassada svizra en Frantscha.

17.10.2022
EDA
Un gruppo di giovani cammina sulle mura di Castelgrande a Bellinzona.

Talian: in ferm toc Svizra. Tenor questa devisa s'engascha il DFAE per la promoziun da la terza lingua naziunala. © EDA

Cura che las 35 emprendistas ed emprendists dal DFAE èn arrivads a la staziun da Bellinzona ina dumengia da settember, han ellas ed els fatg duas scuvertas. Primo: er en la «Sonnenstube» da la Svizra plovi da temp en temp. Secundo: l'emna d'immersiun en la lingua e cultura da la Svizra taliana – ch'è dal reminent ina iniziativa da la Delegada federala per la plurilinguitad – duess esser plain curs da lingua, excursiuns e radis da sulegl.

In insatg da la Svizra taliana en 60 secundas

Las trais emprendistas da mediamatica Alea, Lea ed Amy han survegnì ina incumbensa tut speziala, numnadamain da crear cun lur telefonins in video davart tut quai ch'ellas han vesì ed emprendì al sid da las Alps. «Sche vus purtais a chasa il plaschair che vus avais resentì cun scuvrir la lingua taliana e cun quai er la moda da pensar da l'auter, alura avain nus cuntanschì ensemen ina massa»: cun quests pleds è il president da la Confederaziun Ignazio Cassis sa drizzà a la gruppa d'emprendistas ed emprendists al cumenzament da lur viadi. 

Ina suletta emna na tanscha natiralmain betg per scuvrir tut, ma las emprendistas ed ils emprendists han vulì cumprovar al cusseglier federal tessinais che l'emprima finamira è cuntanschida. A chaschun da la «Settimana della lingua italiana nel mondo» han ellas ed els regalà ad Ignazio Cassis lur video. In regal simbolic ed ina regurdientscha d'in viadi tras novas cuntradas e novs pleds en talian.

Fermada a Paris

Las collavuraturas ed ils collavuraturs dal DFAE s'engaschan er a l'exteriur per render pli enconuschent e per scuvrir da nov il patrimoni linguistic e cultural da la Svizra taliana. L'ambassada svizra en Frantscha è ida a la tschertga da relaschs da svizzers talians dal passà e dal preschent. Al cumenzament da la lunga glista è Alberto Giacometti, in artist grischun che ha stgaffì ovras artisticas da renum mundial en in atelier da 24 meters quadrat en il quartier da Montparnasse. En il rom da la «Settimana della lingua italiana nel mondo» ha l'ambassadur svizzer Roberto Balzaretti visità l'Institut Giacometti, l'emprim museum ch'è deditgà dapi l'onn 2018 a la vita ed a las ovras da l'artist e che vegn administrà da la fundaziun cun il medem num.  

L'ambassada svizra en Frantscha è ida a la tschertga da relaschs da svizzers talians dal passà e dal preschen.

Alberto Giacometti n'è però betg l'unic svizzer talian che ha laschà ses fastizs en Frantscha. En in artitgel ch'è vegnì publitgà sin la pagina d'internet houseofswitzerland.org, propona l'ambassada intginas etappas per scuvrir – a pe u cun il velo – las ovras da l'architect Mario Botta oriund da Mendrisio e da l'artist Felice Varini da Locarno.

SWISS STORY

Talian – in ferm toc Svizra

Auf gelbem Hintergrund ist das Motto "Italienisch: ein starkes Stück Schweiz" in die vier Landessprachen übersetzt.
La promoziun dal dialog intercultural è in punct central da la diplomazia svizra. © EDA

Tenor questa devisa s'engascha il DFAE per la promoziun da la terza lingua naziunala. La Svizra è preschenta sin tut il mund cun 170 represchentanzas e var 2300 collavuraturas e collavuraturs al lieu. La diversitad da las linguas discurridas, ultra da las linguas naziunalas da la Svizra, è gronda. La promoziun dal dialog intercultural è pia in punct central da la diplomazia svizra.

Las emnas tematicas sco quella ch'è deditgada a la lingua taliana èn per il DFAE ina chaschun per metter en il center la diversitad da noss pajais e per la render pli enconuschenta er a l'exteriur, saja quai cun artitgels, intervistas u istorgias. 

Zum Anfang